簡介：
唐戶市場，絕對係福岡（其實係山口縣下關）旅遊最常被推薦嘅景點之一。唔講笑，無論你上網睇 YouTube、Blog 定係旅遊書，都幾乎一定有人話：「呢度啲壽司、海鮮又平又好食，非去不可！」見咁誇張，我哋當然都唔可以錯過，特登排咗行程去朝聖。

不過去之前，大家真係要有心理準備，唐戶市場個地點真係好唔方便。唔似東京築地或者千客萬來，出咗地鐵站行幾分鐘就到。呢度你要先搭火車，再轉船先到得落，仲要唔係日日開，行程安排上幾麻煩。

我哋大約11點左右到達，已經見到市場入面好多海鮮檔排緊長龍，氣氛好熱鬧。不過檔口賣嘅嘢其實大同小異，基本都係壽司、魚生、炸物，偶爾先見到一兩檔有賣河豚料理。

我買咗以下幾樣試下：

• 海膽三文魚子飯
• 炸大蝦
• 自助壽司拼盤（帶子、拖羅、甜蝦、海膽軍艦）

唐戶市場入面無堂食位置，我哋只可以係市場出面附近搵枱坐低食。首先試自助壽司拼盤：拖羅唔算差，但多筋，阿囡仲投訴咬唔開，帶子味道普通，有少少鮮甜，但比較薄，比起我之前係迴轉壽司嗰啲差好幾個級數，海膽軍艦……真係笑咗出聲，一粒粒硬到好似擦紙膠咁，就算係個盒入碌佢3－4次，都完全無散開，的海膽唔係一塊塊，係碎開一粒粒再壓實，真係超級難食，壽司飯全部又乾又冰（唔係室溫凍，係好似啱啱雪櫃攞出嚟咁凍），紫菜軟晒，食完絕對想喊。

炸蝦就更唔洗講，味道同超市買嘅差唔多，甚至不如百貨公司地庫美食專區個啲水準，完全無驚喜。

到最後試海膽三文魚子飯，結果更加崩潰。海膽完全唔新鮮，入口無 creamy 感，仲有腥味；三文魚子更加恐怖，粒粒都腥味爆錶，成碗飯凍到硬晒，根本食唔落。

腥到咁，我真係頂唔順，衝去便利店買薄荷糖清清口腔先得。

老實講，我真係好疑惑——點解成個網絡都話唐戶市場必去？好食？抵食？我真係寧願去超市買盒壽司，味道好過百倍，仲平幾倍，至少唔會食到我想爆粗。

前一日我先喺小倉嘅旦過市場食過壽司，人哋個市場都唔係海邊啲魚市場，人流又冇咁多，反而嗰邊啲壽司海鮮，鮮味好好多，價錢又合理，簡直贏唐戶市場幾條街嘅距離。今次唐戶真係坐上美軍直升機：伏伏伏伏伏（嚴重中伏，踩中地雷），質素連超市都不如，浪費時間又浪費心情。

可能我時運低啦？又或者你運氣夠好唔會遇到啲腥到爆嘅魚生。但講真，我就唔敢再試第二次喇……

🔸整體評分🔸
🍽️ 食物品質：☆☆☆☆☆
🧑‍🍳 服務態度：★★☆☆☆
💰 價錢合理：☆☆☆☆☆
📍 地點便利：★☆☆☆☆
🪑 環境整潔：★★★☆☆