店名：勝烈亭 新市街本店
地點：熊本県熊本市中央区新市街8-18 林ビル　１Ｆ
種類：吉列豬扒
其他：收credit card，不可預約，小朋友可以入店，全店禁煙
網址：https://tabelog.com/kumamoto/A4301/A430101/43000307/
評分：Tabelog 3.73/5 / 通少評分3/5
簡介：

嚟到熊本，除咗熊本熊真係無人唔識之外，當地人同遊客一致推介嘅「勝烈亭」吉列豬扒，都係一個必試名店。勝烈亭喺熊本有三間分店，我今次參觀完熊本城之後，特登行去佢本店朝聖。

由於勝烈亭唔接受預約，我哋大約11點到達，點知已經有人排緊隊。好彩佢哋排隊系統係電子化，喺門口平板電腦攞飛之後，就可以用手機隨時睇下排到幾多號，唔一定要係餐廳入面等，呢點幾貼心。

講真，我真係好少見過一間吉列豬扒專門店咁大，兩層高，而且仲要坐滿人，場面非常誇張。不過觀察一下，似乎有一半客人都係外地遊客，證明呢間餐廳嘅名氣確實響。

我叫咗個炸蝦 + 六白黑豚豬扒套餐，太太都叫同一款，而阿囡就叫咗個兒童餐。可惜當日太太身體唔舒服，食唔落，阿囡又腸胃唔舒服，最後就淨返我一個人慢慢歎。

食物賣相無得彈，豬扒厚切、炸蝦金黃酥脆，睇落去真係好吸引。但可惜，味道就遠遠追唔上賣相。豬扒筋位好多，咬落去完全唔係應該有嘅「一咬即斷」效果，肉質比較實，唔夠嫩滑。雖然炸得幾香脆，但油份偏多，每食兩塊就要靠啲醋蘿蔔蓉幫手解膩，食到一半已經覺得滯晒。反而炸蝦仲叫做鬆化彈牙，表現比豬扒出色，真係有啲意料之外。

講真，我對日本吉列豬扒一向要求極高，目前心中No.1依然係池袋「嬉嬉豚とんかつ」，嗰種入口即化嘅感動，至今難忘。勝烈亭雖然名氣大，但整體表現未如預期，一試無妨，但唔會再特登嚟食。

不過公平啲講，呢間餐廳整體環境唔錯，服務又有禮貌，價錢唔算過高，可能只係咁啱我唔好彩，先覺得唔好食，如果你未食過，想試吓傳說中嘅名店，都不失為一個選擇，記住早啲去排隊，唔使等太耐。

🔸整體評分🔸
🍽️ 食物品質：★★★☆☆
🧑‍🍳 服務態度：★★★★☆
💰 價錢合理：★★★☆☆
📍 地點便利：★★★☆☆
🪑 環境整潔：★★★★☆