店名：博多豊一長浜食堂
地點：福岡県福岡市中央区地行浜2-2-6 E・ZO FUKUOKA 3F
種類：燒牛肉料理
其他：收credit card，可預約，小朋友可以入店，全店禁煙
網址：https://tabelog.com/fukuoka/A4001/A400105/40054832/
評分：Tabelog 3.20/5 / 通少評分2.5/5
簡介：

第二日行程我哋就去咗好有名嘅 teamLab Forest，聽講杜如風都介紹過！入面好多互動投影裝置，打卡又靚，我哋一家都玩得超開心，一玩就玩到下午四點幾。

雖然時間未算晚，但我時差都未調節好，加上覺得早啲食飽，如果七點幾訓覺都唔使怕半夜餓醒，所以就喺 teamLab 商場搵餐廳醫肚。今日係平日又唔係繁忙時間，成層都唔多人，去到3樓有兩間餐廳可以揀，兩間都唔洗排隊，一係去『暖慕』食拉麵，一係就係我今次試嘅——『焼肉赤身 にくがとう』。

其實我對拉麵興趣一般，所以揀咗呢間燒肉。見到餐廳門口有好多介紹，又話係東京分店好出名，牆上又掛住唔少名人簽名，心諗應該唔會中伏啦。

雖然間餐廳係主打燒肉，但我哋唔係太想自己燒，最後就叫咗佢嘅招牌燒牛肉飯。普通版用美國牛，我作為加拿大人真係冇乜興趣，硬住叫咗最貴嗰款——黑毛和牛版，個飯除咗牛肉，仲有加海膽同三文魚子，要5000 yen。阿囡就叫咗個兒童咖喱餐。

黑毛和牛牛肉飯——牛肉本身唔差，醬汁味道都OK，不過我真係覺得熱辣辣嘅牛肉飯，加埋凍冰冰嘅海膽同三文魚子完全唔夾，口感有啲奇怪。如果分開食可能仲好啲。另外，份量唔多，性價比真係唔高。

至於服務……可能因為係下午非繁忙時間，侍應明顯好冷淡，全程都係用平板電腦落單，水要自己去攞，基本上都冇咩人理你。

整體嚟講，呢餐唔係話難食，但完全唔值呢個價錢。如果你真係嚟到 teamLab Forest，反而我會建議你揀『暖慕』食拉麵會開心啲。

🔸整體評分🔸
🍽️ 食物品質：★★★☆☆
🧑‍🍳 服務態度：★★☆☆☆
💰 價錢合理：★★☆☆☆
📍 地點便利：★★☆☆☆
🪑 環境整潔：★★★☆☆