店名：炙り百貫
地點：佐賀県佐賀市兵庫北5-14-1 ゆめタウン佐賀1階 （係佐賀Youme Town 入面）
種類：迴轉壽司
其他：收credit card，小朋友可以入店，全店禁煙
網址：https://tabelog.com/saga/A4101/A410101/41007546/
評分：Tabelog 3.24/5 / 通少評分4/5
簡介：

嚟到佐賀，其實車站附近大多數都係居酒屋或者燒肉店，反而壽司店就唔多見。我哋有一日去咗 Youme Town 商場行街，咁啱見到有間叫「炙り百貫」嘅迴轉壽司店喺商場入面。

見到啲壽司好似好最吸，而且唔洗排隊！不過當時我都有啲猶豫，因為無預先上網做資料搜集，成間店又唔算好多人，心入面都有少少驚：「咁冷清，究竟得唔得㗎？」

食迴轉壽司，其實有個超大優點——就係「試錯成本低」！你食咗兩三碟覺得唔掂，畀錢走人就得，完全零壓力、零束縛，所以我就話：「試吓啦，有乜所謂！」

一坐低就安心晒，因為所有壽司都係用平板電腦落單、即叫即整，見到都開心咗一半。頭三碟我哋試咗帶子、中拖羅、同海膽軍艦。

• 帶子大粒又鮮甜，咬落去爽口彈牙；
• 中拖羅油花分布靚仔，冇筋，肥美滑口，完全無得彈；
• 軍艦壽司啲紫菜香脆唔會淋晒，紫菜唔會好似食緊紙巾咁；
• 至於海膽味道就中規中矩，鮮甜帶點甘。

三碟試完，已經好滿意，立即開大食 mode，我哋三個人食到好似餓鬼上身咁，狂掃咗三十幾碟！ 真係食到心滿意足 + 幸福爆燈！

當然啦，迴轉壽司質素未必次次穩定，不過我建議大家都可以學我試三碟先，就算唔啱，都係放低幾千YEN就走得，唔傷身又唔傷荷包。

唯一要留意嘅係：地點比較唔方便，離車站有段距離，如果唔係本身會去Youme Town行街，就唔建議專登過嚟。

🔸整體評分🔸
🍽️ 食物品質：★★★★☆
🧑‍🍳 服務態度：★★★☆☆
💰 價錢合理：★★★☆☆
📍 地點便利：★★☆☆☆
🪑 環境整潔：★★★★★