店名：湯の岳庵
地點：大分県由布市湯布院町川上2633-1 亀の井別荘 （係由布院）
種類：牛肉飯
其他：收credit card，可預約（只限打電話），小朋友可以入店，全店禁煙
網址：https://tabelog.com/oita/A4402/A440201/44000042/
評分：Tabelog 3.71/5 / 通少評分4/5
簡介：
今日終於嚟到由布院，呢個地方老實講，絕對係遊客重災區，基本上成條街都係靠旅客（唔論本地定外地）支持經濟，變相就係好多直升機餐廳同店舖——即係咩？「伏伏伏」好似直升機聲咁，俾人搵笨嘅機率極高。
大約去到中午，發現大部分餐廳都已經排晒長龍。唔少人都話嚟由布院一定要食「由布まぶし心」嘅牛肉釜飯（煲仔飯），但一來排隊人龍太長，二來我覺得牛肉釜飯其實到處都有，唔係非試不可，所以決定改去金鱗湖附近一間旅館餐廳「湯の岳庵」，試下有無驚喜。
原來呢間餐廳平時都要排隊，不過我夠早，11:30一到就有位入去食，超幸運！後來仲聽到侍應同其他客講可以電話預約（我都識聽少少日文呀，呵呵），下次想試可以打定電話訂位先。
講返環境，餐廳裝修以木材為主，超有日式風味，又寧靜又舒適，座位寬敞唔迫夾，氣氛一流。唯一美中不足係侍應有啲催我哋快啲落單，可能見人多想快啲周枱，但我就唔太鍾意俾人趕住點餐，呢方面略嫌失禮。
我哋叫咗三款餐：
- 炭燒牛肉飯套餐（包溫泉蛋）
- 炭燒牛扒套餐
- 兒童漢堡餐
重點介紹嗰個炭燒牛肉飯——牛肉竟然係厚切！但完全唔韌，口感超級嫩滑，再配埋溫泉蛋嘅蛋液，整碗飯即刻昇華到另一層次，滑得嚟又有肉香，真係好好食，呢個絕對係我個人推介！
兒童餐都唔馬虎，漢堡扒有肉汁、夠軟熟，唔會因為係小朋友餐就hea住整。仲有兩個大大飯糰，份量十足，小朋友一定食得飽飽！
唯一覺得普通嘅係牛扒套餐，雖然味道唔差，但比起炭燒牛肉飯就明顯冇咁突出，唔夠香唔夠惹味，下次會寧願再食炭燒牛肉飯多次。
價錢方面，以遊客區嚟講都算公道，加埋味道正、環境靚，就算服務一般，我都覺得呢間係值得一試嘅好選擇。總好過去逼爆嘅「由布まぶし心」啦！
🔸整體評分🔸
🍽️ 食物品質：★★★★☆
🧑🍳 服務態度：★★★☆☆
💰 價錢合理：★★★☆☆
📍 地點便利：★★★★☆（近金鱗湖）
🪑 環境整潔：★★★★★