店名：博多豊一長浜食堂
地點：福岡県福岡市中央区長浜2－5－25 （赤坂駅北面行15分鐘）
種類：自助壽司，海鮮丼，海鮮料理
其他：收credit card，可預約，小朋友可以入店，全店禁煙
網址：https://tabelog.com/fukuoka/A4001/A400104/40039058/
評分：Tabelog 3.47/5 / 通少評分3.5/5
簡介：

今年好開心終於嚟到九州福岡旅行！一落機我就住咗喺博多區，第一日行程就預約咗【博多豊一長浜食堂】。其實佢有兩間分店，今次我去嗰間係近赤阪站北面，行過去大約十五分鐘，喺大濠公園附近。地點啱啱好符合我行程，最重要係可以預約！因為我最怕旅行時要企喺門口排兩粒鐘等位，就算有幾好食，我都寧願放棄唔食。

雖然餐廳位置唔算特別方便，但入面環境乾淨舒服，枱與枱之間距離闊落，有小朋友或帶BB車都無問題。店員服務態度非常好，比起東京啲餐廳，真係感覺親切好多。

呢度有兩種點餐方式，一係去自助區揀壽司，每件只係110 yen，款式唔算太多；另一種就係用平板電腦落單，可以揀海鮮丼、燒海鮮、湯品等等。

先講壽司——整體唔錯，未至於頂級，但以價錢嚟講係超值！我食咗大、中拖羅（吞拿魚），冇筋（有筋就唔合格），飯量啱啱好。魚生切得略薄，不過勝在新鮮。唯一扣分位係軍艦壽司——紫菜太淋，冇咗脆口感。

海鮮料理方面，我叫咗一碗魚湯，夠熱唔腥，幾好飲。好可惜招牌「半板海膽海鮮丼」喺11:45就已經賣晒，超失望！後尾轉咗叫燒海鮮套餐，會有個GAS爐畀你自己燒，海鮮非常新鮮，自己燒又幾得意，阿囡見到啲鮑魚郁下郁下係度尖叫，哈哈哈，燒得開心又食得滿足。

總結一下，如果你啱啱喺附近，呢間餐廳值得一試。唔使排隊、有得預約又性價比高。不過如果你唔係順路，就唔洗特登過嚟，因為地點真係唔係最方便。

🔸整體評分🔸
🍣 食物品質：★★★★☆
🧑‍🍳 服務態度：★★★★☆
💰 價錢合理：★★★★☆
📍 地點便利：★★★☆☆
🍽️ 環境整潔：★★★★☆